Tras o éxito vivido en 2023, onde se bateu o récord de rexistrados ao chegar aos 16 participantes e na que a disputa polo título estivo aberta ata a última proba, a Toyota Gazoo Racing Iberian Cup contará con importantes novidades para 2024. Parte das mesmas radican nun calendario que volverá contar con catro probas en Portugal e outras catro en España. A terra e o asfalto volverán repartirse o protagonismo a partes iguais, unha característica que converte á copa monomarca organizada por Toyota España, Toyota Caetano Portugal e MSi nunha referencia, tanto para os pilotos máis novos que queren progresar nas súas carreiras deportivas, como para aqueles que queren seguir gozando dos ralis cun vehículo de altas prestacións e tracción ás catro rodas como é o GR Yaris RZ Cup.
O ano comezará co Rali Serras de Fafe, que se disputará os días 23 e 24 de febreiro e que se converteu nunha das citas máis emblemáticas da tempada, xa que conta sempre cunha importante asistencia de público dada a espectacularidade dos seus especiais de terra. Para que os afeccionados españois poidan gozar dos GR Yaris da TGR Iberian Cup, haberá que agardar a abril. Por primeira vez e como novidade, os pilotos da Copa disputarán o Rali Internacional Sierra Morena (6-7 abril), sobre asfalto. Logo chegarán dúas visitas consecutivas a Portugal, co Rali Terras Aboboreira (26 e 27 de abril), que se corre sobre terra, e o Rali de Lisboa (6-8 de xuño), no que o asfalto volverá ser o protagonista.
No ecuador da tempada afrontaranse no noso país tres citas consecutivas. Tanto o Rali Rías Baixas (5-6 xullo) como o Villa de Llanes (20-21 setembro), ambos sobre asfalto, serán dúas probas inéditas no calendario da Toyota Gazoo Racing Iberian Cup, mentres que o Rali RACC Catalunya-Costa Daurada (19-20 outubro) volverá ao calendario tras ausentarse en 2023, aínda que o fará sobre terra en lugar de asfalto, como ocorreu en 2022.
En 2024 o final de festa vivirase en Portugal coa última novidade do calendario, xa que por primeira vez se disputará o Rali de Murça (17-18 novembro). Unha proba que será de coeficiente 1,5; é dicir, tanto os puntos que se repartan ao final do Rali como os que reciben os vencedores dos treitos terán un valor especial, algo que pode deixar aberta a clasificación xeral da Copa cos GR Yaris ata os últimos quilómetros da proba.
Ao novo calendario súmanse as melloras nos premios que se entregarán en 2024. Neste sentido, a principal novidade é que o gañador terá a posibilidade de disputar un Rali en 2025 co GR Yaris Rali2, co que Toyota competirá de forma oficial en 2024. Este premio súmase aos 27.500 € que se entregan en cada carreira e aos 64.000 € que se reparten os tres primeiros clasificados da xeral ao final de ano. Ademais, o mellor piloto Júnior (menos de 24 anos), o primeiro piloto Sénior (máis de 54 anos), a mellor piloto feminina e o mellor copiloto (este último premio, outra novidade para 2024) recibirán un cheque de 3.000 €, acumulable ás contías anteriormente mencionadas. Ademais, todos os pilotos que disputen as oito probas do calendario contarán cunha axuda de 1.500 €.
Por primeira vez, as probas celebradas en España desta copa irán da man do Supercampionato de España de Ralis.
| Proba | Data | Superficie |
| Rali Serras de Fafe | 23-24 febreiro | Terra |
| Rali Internacional Sierra Morena | 6-7 abril | Asfalto |
| Rali Terras Aboboreira | 26-27 abril | Terra |
| Rali de Lisboa | 7-8 xuño | Asfalto |
| Rali Rías Baixas | 6-7 xullo | Asfalto |
| Rali Villa de Llanes | 20-21 setembro | Asfalto |
| Rali RACC Catalunya-Costa Daurada | 19-20 outubro | Terra |
| Rali de Murça | 17-18 novembro | Terra |
