Hyundai participará na 102ª edición da Pikes Peak International Hill Climb (PPIHC) o 23 de xuño. Dous Ioniq 5 N de 650 cabalos perseguirán o récord dun SUV/Crossover eléctrico de serie como parte dun equipo de catro coches.
“Volvemos á montaña máis fortes do que a deixamos, cun SUV eléctrico líder na súa clase en forma de Ioniq 5 N”, dixo Till Wartenberg, Head de N Brand e Motorsport. “Hyundai ten un historial de probas de novas tecnoloxías e produtos en Pikes Peak que se remonta a 1992 e Ioniq 5 N traslada ese concepto aos coches eléctricos de altas prestacións. Este modelo con prestacións de serie amosará o que os clientes poden esperar dos seus vehículos.”
Os condutores dos vehículos Ioniq 5 N que van a polo récord de SUV/Crossover eléctrico de serie son Paul Dallenbach e Ron Zaras. Dallenbach gañou en once ocasións o PPIHC e estableceu un récord xeral en 1993. Zaras é un novato no PPIHC e o membro máis recente do equipo. Zaras, unha personalidade dos medios de comunicación e antigo executivo de Hoonigan, foi elixido recentemente para mostrar a historia dun entusiasta do automobilismo que se prepara para este enorme reto de competir en Pikes Peak.
Ademais, Hyundai estreará un Ioniq 5 N con equipamento modificado para competir no PPIHC antes das 24h Adac Ravenol de Nürburgring o 30 deste mes. Dous destes modelos Ioniq 5 N adicionais serán pilotados por Dani Sordo e Robin Shute. Shute é catro veces gañador absoluto e posuidor do título de Rei da Montaña en Pikes Peak. Sordo é piloto español do Campionato do Mundo de Ralis para Hyundai Motorsport.
Hyundai optou por bater o récord do PPIHC Electric Production SUV/Crossover cun Ioniq 5 N porque encarna a capacidade en circuíto de todo vehículo N de altas prestacións. Ioniq 5 N probouse en temperaturas e lugares extremos e desenvolveuse e puxo a punto especificamente no circuíto de Nürburgring Nordschleife para mellorar a súa capacidade en circuíto. Está apoiado por tecnoloxías como melloras estruturais, eixos motrices integrados inspirados no Campionato do Mundo de Ralis, maior xestión térmica, freos con axuste N e unha forza rexenerativa de freada líder no sector de 0,6 G.
Debido ao rigoroso proceso de probas, só se realizaron pequenas actualizacións para cumprir as normas dende o punto de vista da seguridade. O asento do condutor substituíuse por un asento Recaro Prol Racer SPA Hans. Os cintos de seguridade son Sabelt de seis puntos compatibles con Hans. Retiráronse os asentos traseiros e instalouse unha gaiola antienvorco e un sistema de extinción de incendios.
