O aumento dos prezos dos automóbiles novos no noso país non é ningún segredo. Basta con lembrar como evolucionaron as tarifas nos concesionarios ou nas web dos fabricantes. Con todo, un estudo recente baseado en datos da Axencia Tributaria e o Instituto Nacional de Estatística pon en cifras unha realidade incómoda: a suba de prezos nos coches novos superou sobradamente o índice de prezos ao consumo (IPC) e o crecemento salarial.
Entre 2019 e outubro de 2024, os prezos dos coches novos con impostos incluídos incrementáronse un 37,4%, e pasaron de 18.940 € a 26.020. Este aumento é case o dobre do que subiu o IPC (20,4%) e preto de catro veces a alza do salario medio (10,4 %), que alcanzou os 30.240 €. Estes números evidencian unha perda real do poder adquisitivo para os consumidores, que agora enfrontan maiores dificultades para acceder a un automóbil novo.
Pola contra, os automóbiles de segunda man rexistraron unha lixeira caída nos seus prezos (0,94%), e situáronse nunha media de 12.365 €. Isto ampliou a diferenza de prezo entre un coche novo e un de ocasión ata case 14.000 €. Aínda que os prezos dos modelos quilómetro cero ou seminovos tamén subiron, a súa tarifa media está condicionada polo feito de que un 40% dos vehículos de ocasión (VO) en España teñen máis de quince anos.
A inflación nos vehículos novos ten causas coñecidas. Todo comezou coa crise de produción derivada da escaseza de semicondutores, agravada logo por factores xeopolíticos como a guerra en Ucraína, o encarecemento das materias primas e o aumento do custo do diñeiro. Ademais, os fabricantes apostaron por desprazar a súa oferta cara a coches máis grandes, tecnolóxicos e equipados, non só para satisfacer as demandas do mercado, senón tamén para “maximizar beneficios”.
As novas esixencias de seguridade e medioambientais tamén xogaron un papel crucial. Dende 2022, a inclusión de sistemas de asistencia á condución (ADAS) é obrigatoria, e a normativa CAFE, vixente dende este ano, obriga os fabricantes para reducir a emisión media de CO2 a 93,6 gr/km. As multas de 95 euros por cada gramo de exceso por coche vendido apertan as marcas para axustar as súas estratexias. Isto tradúcese en maiores prezos para os automóbiles de combustión e en promocións agresivas para vehículos eléctricos, que necesitan medrar exponencialmente para alcanzar un 20% de cota en 2025. Hoxe, esta cifra está nun modesto 5,6 por cento.
A situación actual deixa os compradores nunha encrucillada. Por unha banda, o coche novo converteuse nun artigo de luxo. Por outro, a opción do VO faise máis atractiva, pero tamén limitada, dada a antigüidade do parque automobilístico dispoñible.
Mentres tanto, os fabricantes enfrontan un difícil equilibrio entre cumprir con normativas medioambientais, manter a súa rendibilidade e responder as demandas dun mercado golpeado pola inflación. A aposta polo coche eléctrico parece inevitable, pero para moitos consumidores segue sendo unha opción custosa e pouco accesible.
A escalada dos prezos dos automóbiles novos no noso país non só reflicte unha serie de crises acumuladas, senón tamén un cambio estrutural no sector automobilístico. A transición cara á electrificación e á sustentabilidade está a ter un impacto directo nos consumidores, que ven como o coche novo se afasta do seu peto.
A solución non é sinxela. É necesario que as políticas regulamentarias promovan un mercado máis accesible e equitativo, á vez que se fomenta a sustentabilidade. Os fabricantes, pola súa banda, deben buscar estratexias que non penalicen desproporcionadamente o consumidor final. En definitiva, só un equilibrio entre a rendibilidade, a regulación e a accesibilidade permitirá que o coche novo deixe de ser un luxo para moitos e volva ser unha opción realista para todos.
