Nada máis sentarnos no posto do condutor notamos que a altura do vehículo é superior á dun SUV das súas dimensións. O asento tipo “capitán”, grazas aos seus repousabrazos a ambos os lados, é moi cómodo, sobre todo
cando facemos un longo percorrido por unha autoestrada.

Como xa dixemos, a propulsión está definida por un motor eléctrico que rende 204 cabalos (150 kW) e que envía a potencia e os 310 Nm de par ao eixo traseiro. A finais do vindeiro ano está programado que chegue o ID. Buzz GTX, con tracción ás catro rodas.

Este alemán está alimentado por unha batería de 77 kWh coa que pode percorrer 420 km (datos oficiais da marca). O consumo da ficha técnica sitúase entre os 20,5 kWh/100 km e os 21,7. A autonomía ten unha relación intrinsecamente directa coa forma de conducir. No noso percorrido de probas, onde utilizamos moito o modo Eco e a posición rexenerativa, os 420 quilómetros de autonomía podemos dicir que son reais. Neste apartado quedamos bastante satisfeitos.

Falando de modos de condución, o ID. Buzz ten catro: Eco, Comfort, Sport e Individual. A posición B, ou rexenerativa, selecciónase dende a nova panca do cambio, situada detrás do volante. Sentiremos unha maior retención do vehículo, pero teremos unha satisfacción en forma de máis quilómetros de autonomía.

 Se utilizamos o modo Sport, a entrega de potencia é máis brutal, a suspensión, máis deportiva e a carrozaría ofrece un pouco de balanceo en curva, se facemos unha condución racing. Pola súa banda, a dirección tórnase un pouco máis dura. Evidentemente o ID. Buzz é un vehículo para un uso tranquilo e eficaz. Neste sentido teremos boas sensacións cunha condución acorde coas súas características dinámicas e co seu motor eléctrico. Ou sexa, planificar ben os itinerarios e circular con velocidades axeitadas ao tipo de vía. En autoestrada ou autovía podemos ira velocidades de cruceiro de 120 km/h tranquilamente.

A suspensión, McPherson no eixo dianteiro é multibrazo no traseiro, filtra ben as irregularidades da calzada. En curva vai ben, podemos entrar, e de feito entramos, a unha velocidade considerable, porque as baterías van no piso (centro de gravidade baixo). A ID. Buzz mostrarase nobre, con rotundidade e achegándonos seguridade. No ámbito urbano este modelo desenvólvese estupendamente grazas a dúas boas calidades: unha altura que lle permite entrar en calquera garaxe e un radio de xiro de tan só 11,09 metros, igualiño ca un Golf. Isto ademais está apoiado polos sistemas de cámaras e sensores.