Se hai unha marca que xa se converteu nun referente do sorpasso chinés á industria do automóbil europeo é BYD. Un acrónimo que significa Build Your Dreams (constrúe os teus soños). Nela basearemos este editorial.
A expectación xerada ao redor do BYD Explorer nº1, o primeiro buque fretado pola marca chinesa para asolagar o Vello Continente cos seus modelos, resume a nova dinámica que se está xerando no sector da automoción mundial. A xigantesca nave partiu con sete mil automóbiles o quince de xaneiro do Porto Loxístico Internacional de Xiaomo, en Shenzhen, no sur de China, con destino aos portos de Vlissingen (Países Baixos) e o de Bremerhaven (Alemaña). Tras a súa primeira parada en Vlissingen, o pasado 26 de febreiro atracou en Alemaña, onde se descargaron tres mil vehículos.
Esta é unha estratexia que elimina, en parte, a necesidade de montar fabricas fóra de China. Eliminando trabas burocráticas, políticas, elevados custos e prolongados prazos. Aínda así BYD ten entre os seus proxectos actuais construír a súa primeira fábrica europea en Hungría. Mentres tanto enviarán unha frota de megabuques con milleiros de coches para inundar o mercado europeo cos seus últimos modelos.
Esta empresa automobilística con sede en Shenzhen está dirixida por Wang Chuanfu, un exprofesor de 57 anos, que arrebatou á norteamericana Tesla o liderado como maior produtor de automóbiles eléctricos. No cuarto trimestre do ano pasado, BYD, fundada en 1995 e que conta coa empresa de investimentos Berkshire Hathaway do magnate Warren Buffett entre os seus accionistas, vendeu a cifra récord de 526.000 vehículos eléctricos, fronte aos 484.000 de Tesla. A previsión para este ano é que a diferenza entre ambos os colosos do automóbil sexa aínda máis grande, evidentemente a favor de BYD. Os fabricantes europeos, como xa temos dito, non xogan nesta liga.
Temos que subliñar que BYD fabrica todo o coche, agás os pneumáticos e o parabrisas. Ademais, e curiosamente, é un dos principais fabricantes de baterías do mundo e as vende a rivais como Tesla e Toyota.
A presión deste construtor chinés obrigou a Tesla a baixar varias veces nos últimos meses os prezos dos seus modelos. Aínda así BYD ten cinco modelos máis baratos que os do seu competidor directo americano, e ademais os seus deseños son máis actuais.
BYD vai despregar sete portavehículos máis nos vindeiros dous anos para paliar a escaseza de capacidade de transporte marítimo para a exportación de automóbiles. A firma espera que construíndo e utilizando os seus propios buques para transportar vehículos conseguirá reducir os custos de transporte e axilizar a súa loxística internacional.
Este tipo de meganaves fretadas por BYD coñécense como “ro-ro”, abreviatura de roll-on/roll-off en inglés, o que indica a súa capacidade para acomodar vehículos que poden entrar e saír do barco de forma independente, eliminando a necesidade de guindastres. Basicamente, un barco “ro-ro” funciona como un garaxe flotante de varios niveis, o que facilita unha carga e descarga máis rápida e, en última instancia, acelera as entregas de automóbiles. O propio concepto dá unha idea das optimistas previsións do fabricante chinés á hora de asolagar outros países cos seus coches eléctricos.
A Unión Europea admite que esta invasión arremete de cheo contra a industria do automóbil do Vello Continente e ameaza con converterse nunha nova dor de cabeza para os nosos fabricantes de automóbiles no medio do cambio que se está a producir dende os motores de combustión aos eléctricos.
Mentres tanto en Bruxelas os políticos continúan coas súas eternas reunións e burocracias. O como nós dicimos están “a velas vir!”.
